Kanó:ron ne Onkwawén:na

Shé:kon sewakwé:kon. Tehawennáhkwa ni’ yónkyats. Ononta’kehá:ka niwakonhwentsyò:ten, wakenakaryà:kon táhnon Ohswé:ken nitiwaké:non. Tewáhsen yà:ya’k na’tewakohseriyà:kon. Oyé:ri niyohserá:ke tsi náhe takatáhsawen Kanyen’kéha akatéweyenhste táhnon wisk niyohserá:ke nikarì:wes Kanyen’kéha wa’kherihónnyen. McMaster nón:wa kateweyénhstha ne tekawennakháhsyons aorihwà:ke; ahsénhatont yohserá:te tsi kahyá:ton.

Yah tewatyé:sen ayonhrónkha’ne tsi nitewawennò:ten. Kawennè:sons tewawennonnyányons táhnon thiya’tekawén:nake tká:konte takontaterihwanòn:we’ne nó:nen enhsatewennahsonterónnyon. Skawén:na ne Kanyen’kéha ne shá:ka ne kawennahsonterónnyonne O’seronni’kéha. Yah é:so nihá:ti teshonhrónkha, ká:ro ní:kon ne énska tewen’nyá:wer shé:kon Kanyen’kéha ronhrónkha kén:tho Ohswé:ken Tóka’ íhsehre ahsahrónkha’ne, ne kwah teyotonhwentsyóhon ahshenaktóthahse yotkà:te taesewahtharónnyon tsi nihá:ti shé:kon ratihá:wi nonkwawén:na. Teyotonhwentsyóhon ahsatahónhsatate kawennarahstányon tsi rotíhthare yonkhihsothokon’kénha, táhnon é:so sataterihónnyen kahyatonhsera’shón:’a onkwawén:na kahyá:ton. Karì:wes ensatyé:nawahste ahsahrónkha’ne nek tsi é:so tsi ensatshennónnya’te nó:nen ahskwé:ni aesa’nikonhrayén:ta’ne nó:nen Onkwehonwehnéha rotíhthare ne rotikstenhokón:’a.

Ohswé:ken nón:we takatáhsawen akatéweyenhste ne Kanyen’kéha. Onkwawenna Kentyohkwa konwá:yats ne yontaweya’táhkwa tsi nón:we kataweyà:thahkwe. 2003-2004 shiyohserò:ten eh kya’tá:rahkwe. Wa’akwatéweyenhste ayakwahyá:ton táhnon tsi ní:yoht tayakwawennakhányon. É:so wa’keweyentéhta’ne eh nón:we nek tsi ó:ni é:so tsi wa’tyakwahtharónnyon onkwatenróshon ne ne ó:ni ronteweyénhstha tóka’ni ronhrónkha nó:nen yah tsi yontaweya’táhkwa teyákwe’s.

Shontayohserò:kten, Kahnawà:ke ya’tkená:tahkwe ne sénha akatéweyenhste. Karonhianónhnha Ts Ionterihwaienhstáhkhwa onkyó’ten. Wa’kheya’takéhnha ne shakotirihonnyén:ni énska tsi niyó:re kayé:ri tsi kahyá:ton. Kahnawa’kehró:non kahwá:tsire thotinónhsote ki’terón:tahkwe. Aóskon Kanyen’kéha ok wa’tyakwahtharónnyon. Yah thayotón:’on O’seronni’kéha akatá:ti tsi nón:we ki’terón:tahkwe táhnon ó:ni tsi nón:we wakyó’tenskwe. É:so tsi onkyé:nawa’se ne tóhsa akenyáhehse ne O’seronni’kéha ónhka’k akhehthárhahse. Nó:nen Ohswé:ken tontá:kewe, onkyó’ten tsi yontaweya’táhkwa, kahyatonhsera’shón:’a tekewennatényeskwe. Tsyóhsera nikarì:wes eh onkyó’ten tsi niyó:re Kenhtè:ke ya’tkená:tahkwe akherihonnyennì:ra. Skátne wa’onkwayó’ten tekeniyáhse tekenón:kwe Ahkwesashró:non. É:so tsi yonkhiyenawà:se ne sénha akà:ronke ó:ni. E’thó:ne teyohserá:ke ontóhetste táhnon Ohswé:ken á:re tontá:kewe. Kanyen’kéha wa’kherihónnyen Onkwawenna Kentyohkwa nón:we ne áhsen niyohserá:ke nikarì:wes. Sok wa’kate’nikonhrísa McMaster nón:we akataweya’tà:na akatéweyenhste ne tekawennakháhsyons aorihwà:ke. Í:kehre nón:wa aonsakherihónnyen tsi nitewawennò:ten né:’e tsi niyorihowá:nen ne Onkwehonwehnéha.

Yoháhehs né:’e ayonhrónkha’ne tsi nitewawennò:ten.Yah tewatyé:sen táhnon é:so kaya’takehnhà:tshera teyotonhwentsyóhon. Nek tsi kwahretsyá:rons sewakwé:kon tsi nítsyon sewahkwísrons aesewatéweyenhste. Kanó:ron ne onkwawén:na.Yonkwateríhonte aetewanónhstate táhnon aetewarihwahní:rate tsi enyónnheke onkwawén:na ne tahatikonhsotóntye raotirihwà:ke.

Nyá:wen.